Azərbaycan Respublikası Konstitusiyası, Maddə 92

E-poçt:

Axtarış:

E-poçt:
@ach.gov.az

Şifrə:

1.Ümumi müddəalar.

1. Bu Qaydalar “Vətəndaşların müraciətlərinə baxılması qaydası haqqında” Azərbaycan Respublikası Qanununa, Azərbaycan Respublikasının Prezidentinin 29 dekabr 1998-ci il tarixli 52 nömrəli Fərmanı ilə təsdiq edilmiş “Dövlət hakimiyyəti orqanlarında, idarə, təşkilat və müəssisələrdə vətəndaşların təklif, ərizə və şikayətləri üzrə kargüzarlığın aparılması Qaydaları”na uyğun olaraq hazırlanaraq Hesablama Palatasında vətəndaşların təklif, ərizə və şikayətləri üzrə kargüzarlıq işlərinin aparılması qaydalarını, vətəndaşların qəbul edilməsinin təşkilini tənzimləyir və Palatanın bütün rəhbər və digər vəzifəli şəxsləri üçün məcburidir.

2. Vətəndaşların təklif, ərizə və şikayətləri üzrə kargüzarlıq işinin aparılması.

2.1. Hesablama Palatasında vətəndaşların təklif, ərizə və şikayətləri (bundan sonra – müraciətlər) üzrə kargüzarlıq işi şöbələrdə bu iş həvalə olunmuş işçilər tərəfindən aparılır.

2.2. Hesablama Palatasında vətəndaşların müraciətləri üzrə kargüzarlıq işinin təşkilini, aparılmasına nəzarəti və metodik rəhbərliyi Maliyyə və təsərrüfat şöbəsinin Ümumi sektoru (bundan sonra — Ümumi sektor) həyata keçirir.

2.3. Vətəndaşların Palataya daxil olan bütün müraciətləri Ümumi sektor tərəfindən qəbul edilərək, daxil olduqları gün qeydiyyat-nəzarət vərəqələrində mərkəzləşdirilmiş şəkildə qeydiyyata alınır.
Əgər daxil olmuş müraciəti göndərmiş şəxsin ünvanını, habelə bu cür müraciətlərin göndərilmə (alınma) vaxtını yalnız zərfdə qeyd olunan ünvan və poçt ştempelinin tarixi əsasında müəyyənləşdirmək olursa, həmin müraciətlərin zərfləri də saxlanılmalıdır. Zərflər digər zəruri hallarda da saxlanıla bilər;

2.4. Vətəndaş tərəfindən imzalanmayan, vətəndaşın adı, atasının adı, soyadı, ünvanı, yaxud işlədiyi yer göstərilmədiyi yazılı müraciətlər anonim sayılır. Hesablama Palatasına daxil olan anonim müraciətlərə baxılmır və Ümumi sektorda saxlanılır. Yuxarı orqanlardan baxılması üçün göndərilmiş vətəndaşların anonim müraciətləri icraçı şöbəyə verilir.  İcraçı şöbə müraciətin anonimliyini araşdırır.

2.5. Müraciətlərin qeydiyyata alınması üçün onların üzərinə vurulan qeydiyyat ştampında bu cür müraciətlərin qeydiyyat nömrəsi (indeksi) və tarixi göstərilir. Qeydiyyat indeksi  müəllifin soyadının ilk hərfindən və daxil olmuş müraciətin sıra nömrəsindən ibarətdir. (Məsələn: D-40). Qeydiyyat indeksinə vətəndaşların müraciətlərinin saxlanılmasını, təhlilini, axtarılmasını və sistemləşdirilməsini təmin edən digər işarələr də əlavə edilə bilər. Vətəndaşın tələbi ilə müraciətin qeydiyyata alınma nömrəsi və tarixi ona bildirilməlidir.

2.6. Vətəndaşın təkrarən daxil olmuş müraciətinə növbəti qeydiyyat indeksi qoyulduqdan sonra qeydiyyat – nəzarət vərəqəsinin “Qısa məzmun” qrafasında həmin vətəndaşın əvvəlki müraciətinin qeydiyyat indeksi, tarixi və predmeti göstərilməklə, onun baxılmaq üçün kimə göndərilməsi barədə məlumat qeyd olunur. Təkrar müraciətin yuxarı sağ küncündə və qeydiyyat-nəzarət vərəqəsində “Təkrar” qeydi yazılır və bütün əvvəlki yazışmalar ona əlavə edilir.
Eyni şəxsin eyni məsələyə dair müxtəlif ünvanlara göndərdiyi müraciətləri (aidiyyatı üzrə) baxılmaq üçün Palataya daxil olarsa, əvvəlki (birinci) qeydiyyat indeksinə kəsr işarəsi qoyulmaqla sıra nömrəsi əlavə edilir (K-10, K-10/2, K-10/3);

2.7. Vətəndaşların şikayətlərinə baxılmaq üçün qanuna zidd hərəkətlərindən (hərəkətsizliyindən) şikayət edilən orqanlara və ya vəzifəli şəxslərə göndərmək qadağandır.

2.8. Qeydiyyat-nəzarət vərəqələrinin nüsxələri və kartotekalarının sayı, müraciətlərə dair  tapşırıqların yerinə yetirilməsinə nəzarətin və onların təhlil olunması, həmçinin məlumatlandırma işinin zəruriliyi nəzərə alınmaqla müəyyənləşdirilir.
Daxil olmuş müraciətlərin kartotekaları, müəlliflərin soyadlarına və ya məktublarda qeyd edilən məsələlərin məzmununa görə əlifba sırası ilə tərtib oluna bilər.
Zəruri hallarda müraciət etmiş vətəndaşların soyadlarının əlifba göstəricisi tərtib edilə bilər;

2.9. Hesablama Palatasının struktur bölmələrinin rəhbərləri vətəndaşlardan daxil olan müraciətlərin tam və düzgün öyrənilməsini, onlara qanunla müəyyən edilmiş müddətdə baxılmasını, baxılma nəticəsində qəbul edilmiş qərarların icrasını təmin etməlidirlər və bu məqsədlə həmin işlər üzərində nəzarəti həyata keçirirlər.
Bu və ya digər səbəbdən, o cümlədən vətəndaşın göndərdiyi eyni müraciətin digər dövlət hakimiyyəti orqanlarından, idarə, təşkilat və müəssisələrindən aidiyyatı üzrə baxılmaq üçün daxil olması və ya müraciətlərə baxılmasının nəticələri barədə məlumat verməyin tələb olunması səbəbindən, vətəndaşların müraciətlərinə baxılmasının nəzarətə alınması zərurəti oluduqda, qeydiyyat-nəzarət vərəqələrinin bütün nüsxələrində və müraciətin üzərində “Nəzarətdədir” ştampı qoyulur.
Vətəndaşın müraciətində qoyulan məsələnin həll olunması üçün son tədbirlər görüldükdən, yaxud məsələyə dair müvafiq qərar qəbul edildikdən sonra nəzarət götürülür. Baxılması haqda əsaslandırılmış və kifayət qədər dolğun cavab verilməyən müraciətlər nəzarətdən çıxarılmır. Nəzarətin götürülməsi barədə qərarı Hesablama Palatasının rəhbərliyi qəbul edir.

2.10. Vətəndaşların müraciətlərinə Palatanın rəhbər işçiləri və digər səlahiyyətli şəxsləri cavab verirlər. Cavab yazılı və ya şifahi şəkildə verilə bilər. Şifahi cavab verildiyi halda da qeydiyyat-nəzarət vərəqəsində müvafiq qeydlər aparılır.
Cavaba qeydiyyat nömrəsi yazılmalı və müraciətə baxılması zamanı aparılan bütün yazışmalar ona əlavə edilməlidir.
Vətəndaşların müraciətlərində qaldırılan məsələlərin hamısı araşdırılıb qüvvədə olan qanunvericiliyə uygun olaraq onlara dair zəruri tədbirlər görüldükdən və buna müvafiq əsaslandırılmış cavab verildikdən sonra müraciətlər mahiyyəti üzrə baxılmış hesab edilir.

2.11. Müraciətə bir ay müddətinədək, əlavə öyrənilməsi və yoxlanılması tələb edilməyən müraciətə isə ən geci 15 gün ərzində baxılmalıdır;
Müraciətin əlavə öyrənilməsi və araşdırılmasına zərurətin olması icraçı şöbə müdiri tərəfindən müəyyən edilərək bu barədə Palatanın rəhbərliyinə əsaslandırılmış təhriri məruzə ilə müraciət edilməlidir. Müraciətə baxılmaq üçün xüsusi yoxlama keçirmək, əlavə materiallar tələb etmək, yaxud başqa tədbirlər görmək lazım gəldiyi hallarda, Palatanın rəhbərliyi tərəfindən müraciətə baxılma müddətini müstəsna hallarda ən çoxu bir ay uzada bilər. Bu barədə müraciət edən vətəndaşa, müraciətin baxılması dövlət hakimiyyəti orqanı tərəfindən nəzarətdə saxlanıldıqda isə dövlət hakimiyyəti orqanına məlumat verilməlidir.
Hərbi qulluqçuların və onların ailə üzvlərinin müraciəti daxil olduğu gündən etibarən ən geci 15 gün ərzində baxılır.
Əgər məlumatın verilməsi barədə müraciətə yuxarıda göstərilən müddətlərdə baxılması nəticəsində lazım olan məlumat öz əhəmiyyətini itirə bilərsə, həmin müraciətə dərhal, bu mümkün olmadıqda isə, 24 saatdan gec olmayaraq baxılmalıdır.

2.12. Palatanın müvafiq vəzifəli şəxsi müntəzəm olaraq vətəndaşların müraciətlərini təhlil etməli, ümumiləşdirməli, vətəndaşların hüquqlarının və qanunla qorunan mənafelərinin pozulması hallarının və səbəblərinin vaxtında aşkara çıxarılıb aradan qaldırılması üçün öz əməli iradlarını bildirməli, işin təkmilləşdirilməsi üçün müvafiq tədbirlər görməlidir.
Vətəndaşların müraciətləri üzrə kargüzarlıq işini aparan vəzifəli şəxslər hər yarımillikdə və ilin sonunda vətəndaşlarının müraciətlərinin təhlili və ümumiləşdirilməsi üzrə materiallar əsasında analitik arayışlar hazırlayıb, onları Palatanın rəhbərliyinə təqdim edirlər. Zəruri hallarda cari təhlili arayışlar da tərtib edilir.

2.13. Vətəndaşların müraciətləri icraçılar tərəfindən mahiyyəti üzrə baxıldıqdan sonra həmin müraciətlər, onlarla əlaqədar toplanmış materiallar və qeydiyyat-nəzarət vərəqələri kargüzarlıq işinin aparılması və müvafiq kartotekaların mərkəzləşdirilmiş şəkildə formalaşdırılması məqsədi ilə kargüzarlıq işini aparan vəzifəli şəxsə qaytarılmalıdır.
Hər bir müraciət mahiyyəti üzrə baxıldıqdan və ya ona dair müvafiq qərar qəbul edildikdən sonra həmin müraciətin üzərində “İşə tikilsin” yazısı və qərarı qəbul edən vəzifəli şəxsin imzası və tarix olmalıdır.
Vətəndaşların müraciətləri, onların mahiyyəti üzrə baxılması ilə əlaqədar toplanmış materiallar və verilmiş cavablar, həmçinin vətəndaşların şəxsən qəbul edilməsi ilə bağlı sənədlər Palatanın təsdiq edilmiş nomenklaturu əsasında iş qovluqlarında yığılır.
İş qovluqlarında sənədlər əlifba sırası ilə yerləşdirilir. Müraciətlərin hər biri və onlara mahiyyəti üzrə baxılması ilə əlaqədar toplanmış materiallar işin içində müstəqil qrup təşkil edir. Bir vətəndaşdan eyni məsələyə dair təkrar daxil olmuş müraciət, habelə həmin məsələyə aid əlavə daxil olmuş sənədlər həmin qrup sənədlərlə birlikdə tikilir.
Sənədlər iş qovluğuna yerləşdirilərkən onların tam şəkildə olması (komplektliyi) və düzgün tərtib edilməsi yoxlanılmalıdır. Mahiyyəti üzrə baxılmamış müraciətlərin, həmçinin düzgün tərtib edilməmiş sənədlərin qovluqlara tikilməsinə yol verilmir.

3. Vətəndaşların qəbulu işinin təşkili

3.1.Vətəndaşların qəbulu Hesablama Palatasının Sədri tərəfindən təsdiq edilən qəbul cədvəlinə uyğun olaraq müəyyən edilən günlərdə və saatlarda vətəndaşların qəbulu otağında həyata keçirilir. Zəruri hallarda Hesablama Palatasının üzvləri vətəndaşları dərhal qəbul edirlər.

3.2.Vətəndaşların müraciətləri ilə əlaqədar qəbulun təşkilini Palatanın Maliyyə və təsərrüfat şöbəsinin Ümumi sektoru həyata keçirir.
Vətəndaşların qəbulu ilə əlaqədar kargüzarlıq işi Ümumi sektorda bu iş üçün həvalə olunmuş işçi tərəfindən aparılır.

3.3.Vətəndaşların qəbulu ilə bağlı onların yazılı və şifahi müraciətləri qeydiyyat-nəzarət vərəqələrində qeydiyyata alınır. Əgər vətəndaşın xahişi əsassızdırsa, ona ətraflı izahat verilir.
Vətəndaşın müraciəti yazılı təqdim edilərsə, bu müraciət Azərbaycan Respublikasının Prezidentinin 29 dekabr 1998-ci il tarixli 52 nömrəli Fərmanı ilə təsdiq edilmiş “Vətəndaşların Dövlət hakimiyyəti orqanlarında, idarə, təşkilat və müəssisələrdə vətəndaşların təklif, ərizə və şikayətləri üzrə kargüzarlığın aparılması Qaydaları”na əsasən əvvəlcədən qəbula yazılmaq istəyən vətəndaşların qeydiyyatı aparılır və qəbulla əlaqədar qeydiyyat haqqında müəyyən olunmuş qəbul vaxtından ən azı 2 saat əvvəl qəbulu həyata keçirən vəzifəli şəxsə məruzə edilir. Vətəndaşın müraciətindən asılı olaraq qəbula aidiyyatı şöbənin rəhbəri dəvət olunur.

3.4.Vətəndaşın müraciətinə baxılma müddəti ərzində bu və ya digər aidiyyatı şöbənin rəhbəri araşdırmanın nəticəsini rəhbərliyə bildirir.
Qəbulu həyata keçirən vəzifəli şəxs tərəfindən araşdırmanın nəticəsi və yaxud da həmin məsələnin nəzarətə götürülməsi haqqında qərar qəbul edilir.

3.5. Vətəndaşın müraciətində göstərilən məsələyə baxılmadıqda və bu barədə vətəndaşa əsaslandırılmış cavab verildikdə müraciət baxılmış hesab olunur. Qəbulun təşkilinə cavabdeh şəxs tərəfindən qəbulun nəticələri barədə qeydiyyat kitabında müvafiq qeydlər aparılır.

3.6. Vətəndaşların qəbuluna dair sənədlər Hesablama Palatası üzrə təsdiq edilmiş nomenklaturaya uyğun olaraq iş qovluqlarına yığılır. Sənədlərin iş qovluqlarında yerləşdirilməsi vətəndaşların  ərizə və şikayətləri ilə bağlı tətbiq olunan qaydalara uyğun olaraq həyata keçirilir.

3.7. Maliyyə və təsərrüfat şöbəsi tərəfindən vətəndaşların müraciətlərinə baxılması ilə əlaqədar qəbulun vəziyyəti və nəticələri ildə iki dəfə (iyulun 1 və yanvarın 1-i vəziyyətinə) Hesablama Palatasının rəhbərliyinə ətraflı məruzə (hesabat) təqdim edilməlidir. Hesabatda aşağıdakı məsələlər əhatə olunmalıdır:
Qəbulda olan vətəndaşların sayı, müraciətlərin (təklif, ərizə və şikayətlərin) hansı məsələlər haqqında olması, müraciətlərə baxılmasının nəticələri haqqında.

4. Vətəndaşların müraciətləri üzrə sənədlərin saxlanılması

4.1.Hesablama Palatası vətəndaşların müraciətlərindən məlumat üçün və sair məqsədlərlə istifadə olunmasını, habelə onların saxlanılmasını təmin etməlidir.
Vətəndaşların  müraciətlərinə dair sənədlərin qorunub saxlanılması üçün Palata rəhbərliyi və müvafiq sənədlərlə işləyən vəzifəli şəxsləri cavabdehdirlər.
Vətəndaşların müraciətlərinə dair sənədlərin saxlanma müddətləri Palata rəhbərliyi tərəfindən təsdiq edilmiş siyahılarla müəyyən edilir.

4.2.Müvəqqəti saxlanılacaq işlər Palata rəhbərinin qərarı ilə arxivə göndərilir.
Vətəndaşların müraciətlərinə dair sənədlərin saxlanması müddətləri bitdikdən sonra həmin sənədlər Azərbaycan Respublikası Milli Arxiv İdarəsinin müəyyən etdiyi qaydada məhv edilir.

5. Məsuliyyət

Palatada  vətəndaşların müraciətləri üzrə kargüzarlıq işini aparan vəzifəli şəxs müraciətlərin qəbul edilməsi, kargüzarlıq işinin aparılması üçün məsuliyyət daşıyır.
Vətəndaşların müraciətlərinə qanunvericiliklə müəyyən edilmiş müddətdə və qaydada baxılmasına görə məsuliyyət müvafiq struktur bölmələrinin rəhbərlərinin üzərinə düşür.